08 September 2010
Tað er ikki á hvørjum degi at vit síggja móðir og dóttir leika á sama liðið.
Hetta hendi á Skála seinasta sunnudag, tá KÍ-kvinnurnar vóru á Skála og leiktu. Bára byrjaði inni í dystinum, og í 69. minutti bleiv dótturin skift inn, og hendan sjálvsama hending var veruleiki.
Soleiðis skrivar www.kvinnufotbolt.com um hesa stuttligu hendingina
Í 69. minutti í dystinum í millum Skála og KÍ í dag kom Eyðvør Klakstein á vøllin. Hon fyllir 15 ár í dag og fekk sín fyrsta dyst á besta kvinnuliðnum hjá KÍ. Tað er nú ikki so óvanligt, men merkisverda í hesum er, at á vøllinum var longu mamma hennara, Bára S. Klakstein, og tískil leiktu móðir og dóttir á sama liðið.
Okkum vitandi so er hetta bert einaferð hent áður, tá Meibritt úr Hørg frá Sumba spældi saman við dóttir hennara Onnu Mariu.
Bára hevur í mong ár verið ein partur av KÍ-kvinnunum, men síðan 2008 hevur hon ikki leikt so nógv. Í ár hevur hon tó valt at taka gaggurnar framaftur. Hon var í fleiri ár liðskipari á kvinnulandsliðnum og hevur eisini í fleiri ár verið venjari hjá gentuliðnum hjá KÍ. Har hevur hon vunnið gull øll árini.
Eyðvør Klakstein er ein leikari, ið ein skjótt fær eyga á á vøllinum. Hon er skjót, hevur góðan teknink, og so hevur hon eisini, hóast sín unga aldur, eitt gott bólt eyga og dugir væl finna síðar liðfelagar. Hana fara vit uttan iva, at síggja nógv til í framtíðini.
